حوار مع حجي دستور
المواطن : السلام عليكم حجي دستور اشلونك ؟
الدستور : بخير الحمدلله انت اشلونك كيف حالك ؟
المواطن : و الله مو بخير حجي
الدستور : ليش يا وليدي عسى ماشر ؟
المواطن : والله حجي أنا شيعي !
الدستور : إي و خير شكو ؟
المواطن : حجي انت شنو مذهبك !
الدستور : أنا علماني
المواطن : زين حجي يعني تبع منو مع أي تيار أي مذهب أي جماعة بدوي حضري شنو انت ؟
الدستور : أنت اشفيك ما تفهم ؟ أنا علماني و ياي من فرنسا يالأثول .
المواطن : أها ... فرنساوي حضرتك ! ؟
الدستور : إي زين فهمت
المواطن : زين حجي الكويت شنو مذهبها ؟
الدستور : الكويت مدنية ملها مذهب معين تتبعه أنت أو غيرك ، بس قانونها على المذهب المالكي
المواطن : طيب حجي دستور يعني لازم اصير مالكي ... ولا تسحب جنسيتي ! ؟
الدستور : لا يبا صير مثل ما تبي عقيدتك كيفك بقلبك .
المواطن : أها ... يعني عقيدتي بقلبي ما يصير أصرح فيها ، و جذي ما تسحبون جنسيتي ؟
الدستور : وليييييه شالله بالانا بهالثولان ، يا بابا صرح قول ابحث أنا معطيك حرية بعقيدتك و ببحثك العلمي و بنشر آراءك ودربك خضر أنت وكل عيال ديرتك .
المواطن : أوووه دستورنا اشفيك ، بالله باجر يطلع واحد ملحد و لا يهودي !؟
الدستور : أنت صج ما تفهم أنا علماني فرنسي كيفك يبه لو يبي ايب بقره و يعبدها هذا دينه انت شكو .
المواطن : حجي دستور طلعت غبي ، صدقني إذ الجماعة اسمعوك ، باجر يسحبون جنسيتك و يصير دستورنا بدون !
الدستور : أهو أهو .. آسف يبه .. تكفه لا تقول حق أحد ... ترى نسيت إني أشتغل دستور بالكويت !
21l9l2010
فراس خورشيد
فراس خورشيد
ليست هناك تعليقات:
إرسال تعليق